காணாமல் போவது பற்றிய குறிப்புதவி

காணாமல்  போவது பற்றிய குறிப்புதவி

ஒரு மழைநாளில்
தொங்கும் நீர்க்கயிறு பற்றி
இரவல் இறக்கை விரித்து
பூவிதழில் பூக்கும் பனித்திவளையுள் பதுங்கி
பறவையின் ஒலிக்குறிப்பில் இணைந்து
புகைபோக்கியில் நுழைந்து வெளியில் நீர்த்து
விளக்கின் எண்ணையில் கலந்து
குக்கரிலிருந்து வெளியேறும் ஆவியோடு சேர்ந்து
நான் காணமல் போய்விட்டால்
என்னை எங்கு தேடுவீர்கள்?

மேற்கண்டவற்றை நான்
எழுதிவைத்தே செல்கிறேன்
அங்கெல்லாம் தேடமாட்டீர்கள்
என்ற நம்பிக்கையுடன்.

- மயூரா ரத்தினசாமி